नवी दिल्ली :केंद्र सरकारने पंतप्रधान कार्यालयाच्या (PMO) नावात ऐतिहासिक बदल करत ‘सेवा तीर्थ’ हे नवे नामकरण जाहीर केले आहे. सेंट्रल विस्टा प्रकल्पाअंतर्गत उभारल्या जाणाऱ्या नव्या PM ऑफिससाठी हे नाव निश्चित करण्यात आले आहे.
देशातील सर्वात महत्त्वाचे आणि निर्णायक निर्णय ज्या ठिकाणी घेतले जातात त्या सर्वोच्च कार्यकारी केंद्राला ‘सेवा’ या भावनेशी जोडण्याचा सरकारचा प्रयत्न या निर्णयातून दिसून येतो. ‘‘शासन म्हणजे सेवा’’ हा संदेश अधोरेखित करण्यासाठी हे नामकरण करण्यात आल्याचे सूत्रांनी सांगितले.
नवीन इमारत आधुनिक तंत्रज्ञान, विकसित पायाभूत सुविधा आणि पारदर्शक प्रशासनाच्या दृष्टीने सज्ज असणार आहे. नव्या नावामुळे प्रशासनिक कार्यप्रणालीला मूल्याधारित ओळख मिळेल, असा सरकारचा विश्वास आहे.
देशातील राजकीय आणि सामाजिक वर्तुळात या निर्णयाची मोठी चर्चा सुरू असून ‘सेवा तीर्थ’ हे नाव शासनाच्या कार्यसंस्कृतीत नवा अध्याय लिहिणारे ठरेल, अशी प्रतिक्रिया तज्ञांनी व्यक्त केली आहे.