निळे प्रतीक न्यूज नेटवर्क,
छत्रपती संभाजीनगर :
शहरात पुन्हा एकदा अतिक्रमण हटाव मोहीम सुरू झाली असून पैठण गेट परिसरात महापालिकेच्या पथकांनी आज सकाळपासून कारवाईला प्रारंभ केला आहे. परिसरात मोठ्या प्रमाणावर अनधिकृत बांधकामे, फूटपाथवरील दुकाने आणि रस्त्यावर अडथळा निर्माण करणाऱ्या संरचनांवर ही कारवाई करण्यात येत आहे.
कारवाईदरम्यान कोणताही अनुचित प्रकार घडू नये, तसेच कायदा व सुव्यवस्था अबाधित राहावी यासाठी पोलिसांचा तगडा बंदोबस्त तैनात केला आहे. अतिरिक्त पोलीस दल, वाहतूक शाखेचे पथक आणि महापालिकेचे अधिकारी घटनास्थळी उपस्थित असून परिस्थितीवर लक्ष ठेवत आहेत.
सकाळपासूनच व्यापारी, स्थानिक नागरिक आणि पादचारी मोठ्या संख्येने उपस्थित राहून कारवाई कशी पार पडते याकडे पाहत होते. काही ठिकाणी व्यापाऱ्यांनी नाराजी व्यक्त केली असली तरी महापालिकेचे पथक नियमानुसार काम सुरू ठेवत असल्याचे दिसून आले.
महापालिकेकडून शहरातील मुख्य चौक, फूटपाथ आणि व्यापारी गल्ली स्वच्छ, मोकळी व सुटसुटीत ठेवण्यासाठी पुढील काही दिवसांत अशाच आणखी कारवाया होण्याची शक्यता आहे. शहराची वाहतूक व्यवस्था सुधारणे आणि नागरिकांना सुरक्षित पादचारी मार्ग उपलब्ध करून देणे हे या मोहिमेचे प्रमुख उद्दिष्ट असल्याचे अधिकाऱ्यांनी सांगितले आहे.